亞洲國際博覽館 （亞博館）AsiaWorld-Expo其實有佢自己既專用停車場，叫做航天城停車場。即係喺11 SKIES旁邊既一個露天停車場。不過佢未必日日開放。所以要去亞博館的話，就要睇我地既介紹，做定功課喇。 1. 航天城停車場 SkyCity Car Park（按我導航）私家車時租：$20；電單車時租：$8。缺點係露天場，又無日泊優惠。仲要唔一定日日開。如果遇上關閉，請選擇下面11 SKIES停車場。 2. 11 SKIES停車場（按我導航）新場，夠闊落好泊，室內場時租當然會貴少少咁多，但係有日泊。所以去亞博館工作既朋友都啱用。泊車後可以沿天橋行過去亞博館，打風落雨都唔怕，越對係好選擇！另外，地庫將會有一個收費既充電場，不過暫時未開。而我地泊邊好Y爺已經一早為大家去視地視察過，有興趣既朋友可以睇埋下面條片。 https://youtu.be/sKsZWhsHNKc 3. 機場4號多層停車場（按我導航）泊機場轉一個站既機場快綫都係好選擇。因為機場快綫去博覽館收費只係$5。4號多層停車場比11 SKIES平少少，同埋有24小時泊，所以要去博覽館長時間工作既朋友就啱喇。 #區區泊邊好 #充電泊邊好

今日唔係帶大家去飲飲食食，亦唔係帶大家去玩，而係帶大家去慈山寺參學。 我諗大家都知道慈山寺係由香港首富李嘉誠先生所成立嘅基金會出資興建，於2015年4月正式向公眾開放。當中最為人所吸引嘅就係七十米高嘅觀音聖像，一齊黎睇吓啦。 素白色嘅觀音聖像由青銅合金鑄造，聖像外面噴塗白色氟碳自淨漆。而觀音嘅造型係追模宋式，法相悲莊嚴，頭頂髮髻中現阿陀佛像，寓意無量法力庇佑眾生。觀音嘅右手拎住智慧寶珠〝摩尼珠〞，左手拎住淨瓶，施灑淨水，清涼世界。法身佩戴瓔珞，衣帶當風，典雅飄逸。觀音頭部微微低垂，俯瞰眾生，以慈悲與智廣度一切有情。 慈山寺建築設計理念力求延續中國佛寺建築傳統，借鑒盛唐建築嘅風格，並謹慎結合現代科技與創意，設計兼具傳統特色與現代功能之弘法道場。 慈山寺建築依自然環境佈局，山門、彌勒殿、大雄寶殿均座落於主中軸線上，具傳統寺廟均衡對稱之美。東區以戶外觀音立像為核心，兩側栽種十八棵古羅漢松，至觀音殿形成自然輔軸線，體現因地制宜之智慧，殿堂間以開放式迴廊相連，既保持內庭園之寧靜，亦令四方美景收於眼底。 經中記載，觀音菩薩居於補怛洛伽山，普門前嘅圓形池就係依此命名為洛伽池。洛伽池直徑八米，圓型，池壁高約半米。池中分內外兩個池，作同心圓狀，池水由內池湧出，向外池流動。經外池溝槽匯入地下，再經內池中心湧出，如此循環不已，池內活水生生不息。內外池獨具匠心之設計令到水同池邊相平，遠望如鏡，象徵智慧之觀照。 預約來寺參學 慈山寺為平衡參學質量、訪客安全、交通配套、寺院莊嚴、睦鄰關係。入寺參觀係需要預約登記的。 登記參學一經確認，登記人將於一小時內收到確認電郵，內容包括參學編號、參學日期、進寺時間及參學人數。參學人士進寺時必須向工作人員出示電郵或參學編號。所有登記均不得轉讓。 預約網址：https://www.tszshan.org/home/new/zh-hk/visit.php 而由於實在太多人登記參學，所以你要早一個月嘅朝早八點正去以上網址搶30日後嘅參學。即係假設今日早上八點係7月20日嘅話，你就係搶緊8月19日嘅參學。你遲少少登入網站都畀人搶晒呀！ 大家咁有善心搶住去慈山寺參學係好事黎嘅，所以泊邊好想講多一件事畀大家聽。就係慈山寺只有極少量車位供善信停泊，就係上圖嗰幾個位咁多。所以除非你扶老攜幼咁去，否則請留番泊車名額畀有需要嘅善信用，後生又有錢嘅朋友，喺大埔墟轉的士去、或者搭75K巴士到䃟頭角落車行入去，步行約20分鐘。 #其他泊邊好文章 #其他廟宇

位於銅鑼灣天后興發街至屈臣道 (即係東區走廊天橋底) 之間嘅東岸公園主題區將於2021年9月25日開放。呢度有一條170米長既防波堤，仲有草地休憩空間同埋兒童遊樂設施。而最重要嘅係，呢度將會係全港島首個不設欄杆嘅斜堤。 而早前發展局搞嘅維多利亞港字型藝術裝置設計比賽亦已經有結果，得獎者就係黃鋈暉同林熹敏，佢地所創作既巨型字體藝術裝置就會喺呢個東岸公園主題區度展出，到時大家就可以去打咭喇。 東岸公園主題區泊車泊邊好？ 1. 北角屈臣道越秀停車場（按我導航） 呢個新開既場，喺正公園入口旁邊。仲有個收費既快叉。有時租有日泊，啱晒帶小朋友去放電。 2. 天后海景大廈停車場（按我導航）呢個場真係又近又平，泊完車行去公園都唔駛兩分鐘。而最抵嘅係，逢星期日及公眾假期，時租半價！！不過位就唔太多，仲要留匙，同埋注意呢個場星期一至日都係收八點。 3. 維多利中心停車場（按我導航）就喺上面介紹嘅海景大廈停車場正對面，所以行出去東岸公園一樣咁近。呢個仲係多層停車場黎添，位就一定夠，只係價錢貴好多。不過讀者話呢個場好地獄吓，我地就未泊過，暫時評住三星地獄先，即係七人車如非必要勿入。 4. 海峰園(露天)停車場 （按我導航） 想要日泊的話，可以考慮海峰園，日泊只需$120，但係記住，係泊露天嗰個，而唔係屋苑嗰個，屋苑嗰個係$160的。簡單講，去到停車場口，轉左就係露天，直去就係屋苑。 最後講埋啦，屈臣道同埋威非路道都有數十個錶位的。所以你可以先輚入去威非路道經興發街同景明道入番去屈臣道睇咗錶位先。 #各區公園泊邊好 #銅鑼灣 #區區泊邊好

618上海街係由市建局活化保育而改建成既商場，呢度係本港較少擁有完整騎樓嘅唐樓群，所以喺呢次保育入面，騎樓同麻石柱佔咗好重要嘅一環，你仲可以睇到1920年代嘅老店風貌同廣告。 叫得做商場，但係呢度啲鋪都係以懷舊同特式為主，例如有一間鋪係賣80年代日用品嘅，例如以前工廠妹必備嘅銀色鋁質飯壺你見過未？仲有日式古著店同埋懷舊文具鋪連餐廳，想睇嘅自己揸車去睇啦！ 講咗咁耐，究竟去618上海街泊車泊邊好？ 1. 朗豪坊停車場（按我導航）以距離黎計同知名度黎講，泊朗豪坊都係首選，不過價錢貴同埋星期六日長期排隊呢個問題就解決唔到嘅。唔想排隊就睇埋下面嘅介紹啦，至於朗豪坊停車場時租價錢詳情請參閱泊好先。 2. 廣東道1112號多層停車場（按我導航）唔想排隊又想平少少嘅話，廣東道呢個場啱晒你。其實又唔係話遠好多，豪華戲院你仲記唔記得喺邊？就係喺嗰度行番出上海街之嘛，5分鐘都唔駛。時租只需$28，平朗豪坊成十蚊一個鐘呀！價錢詳情請參閱泊好先。 3. 旺角道壹號停車場（按我導航）泊邊好介紹得比你點止咁少？再搵多一個再平啲嘅場比你，只需$25一個鐘，仲要行少一條馬路。係咪好吸引先？唯一缺點係要入車LIFT，唔知點解好多人都好怕入車LIFT，明明同泊位一樣之嘛。價錢詳情請參閱泊好先。 #泊邊好文章 #搵食自駕遊 #親子自駕遊 #遊樂自駕遊 #旺角 其餘熱門泊邊好文章：東涌泊車泊邊好？D2 Place滿晒附近泊車泊邊好？港外線碼頭搭船去離島玩泊車泊邊好？全港Donki尋寶地圖海洋公園泊車泊邊好The Wave / 觀塘工業區 泊車泊邊好？