大圍（本文泛指大圍港鐵站附近既積福積輝街一帶）一向想泊車真係好艱難。一係就泊街或者搏嗰少量嘅錶位，如果唔係就要泊出名地獄嘅富嘉花園。所以今集區區泊邊好，我地就為大家介紹吓大圍仲有咩好停車場可以泊。而最特別嘅係，我地今集請咗喺YouTube發佈4K POV行車片好出名嘅HK Driver Mike黎同我地一齊挑戰富嘉地獄，當然唔少得大圍區嘅飲食情報介紹啦。有興趣嘅朋友可以睇以下既片段，齋想睇停車場嘅朋友請繼續睇落去。 https://www.youtube.com/watch?v=bw0De9MsO6w 圍方停車場（按我導航）全新既圍方停車場，完美解決咗大圍泊車既難題，仲有18個中速充電位，可能唯一缺點係時租較為貴。免費泊車優惠請參閱：圍方 - Parkbin 泊邊好 海福花園停車場（按我導航）沿住港鐵站天橋行就可以黎到海福花園停車場。唯一缺點係時租只可以泊露天位，同埋過番大圍要經天橋，不過依家天橋都有電梯，應該唔算缺點啦？而最重要係咩呀？佢仲平過地獄場，咁唔駛諗啦。價錢詳情請參閱泊好先。 富嘉花園停車場（按我導航）人生難免會泊幾次地獄停車場既。咁富嘉花園點解被稱為地獄呢，首先上落通道窄，其次係車位勁窄，泊完都開唔到門，而最衰既係佢無電梯，你泊幾高就要行番幾多層樓梯。不過，如果你有睇上面條片的話，我地版油係咁衝都無問題，事實上無大家想象中咁窄，學阿Mike話齋，沙田區大把場窄過佢。至於車位窄，只要你泊高多幾層，同埋搵啲柱邊位泊，咁都OK開到門。佢係有啲位有水喉突出黎嗰排位窄啲，其餘啲位都算正常既。咁當然，最近大圍港鐵站，價錢一定係最貴架喇。價錢詳情請參閱泊好先。 #區區泊邊好 #沙田

位處於跑馬地的養和醫院係港島區其中一間出名既醫院，有很多名人都會喺養和醫院生小朋友。養和醫院的人流車流亦很多，而養和醫院停車場亦經常爆滿。 在養和醫院附近的馬路會有一些錶位，粗略估計大約有20個左右。錶位的流動性算高，但問題在於路面狹窄，通常係單程路，所以沒有太多馬路可以讓你停車等位，有時只能兜圈碰碰運氣。 除此之外，有準爸爸經常會問養和醫院日泊，通常就是太太會在養和醫院生小朋友。如果想將車日泊在養和醫院八小時計算，按泊好先紀錄的時租收費計算，總數係$360，兼且會阻礙停車場的流動性讓有需要的人無法使用。 最後一提，喺離開醫院前可以先去自助繳費機交費截數，咁就會多15分鐘走盞時間。 如果打算在養和醫院長時間逗留，不如考慮附近的誠和閣停車場。逢星期一至五都有日泊和夜泊，兼且每小時最高只是$24，泊足八小時也不需要$200。（按我導航）

好多人都問香港文化中心泊邊好，泊邊好當然會為你解決泊車問題啦，今次為你介紹周邊3個最近又最平嘅停車場俾大家。有一個仲可以用$8泊6個鐘添。 1. 海港城 (海運大廈) 停車場（按我導航）海運大廈停車場就應該係人都識架喇，車位夠多，仲有免費泊車優惠。適合行街shopping再去文化中心嘅你。泊車後沿住尖沙咀碼頭巴士總站方向行5分鐘內就到。免費泊車優惠請按以下hashtag瀏覽商場專頁。停車場時租價錢請參閱泊好先。 2. K11 Musea（按我導航）K11 Musea又係另一個又近又有免費泊車優惠嘅停車場，如果你係夜晚去睇show的話，K11 Musea更加係首選。因為佢依家做緊一個 #限時夜泊優惠，只要你喺佢個商場嘅指定食肆消費滿$50的話，就可以由下午5點免費泊車至晚上12點。免費泊車優惠請按以下hashtag瀏覽商場專頁。停車場時租價錢請參閱泊好先。 3. 中間道停車場 H Zentre（按我導航）H Zentre做緊泊兩小時或以上，無條件免費一小時優惠，無需登記，無需消費，直接拍八達通出閘就會減番，係近期去尖沙咀既不二之選。另外，黃昏六點後入車時租價錢只係$18！全尖沙咀最平，再用埋上面講嘅免費一小時優惠，即係俾$18就可以泊2個鐘。同埋，中間道停車場個夜泊超平，只需$95就可以由晚上6點泊到第二朝8點。 #其他泊邊好文章 #海港城 #K11 Musea #H...

註: 本文係教你泊香港口岸轉金巴既流程。如果你想知道點樣申請直接揸車去澳門的話，請參閱 "乘電車跨過大海｜揸車去澳門好容易｜申請方法、最平保險介紹｜一文全攻略" 。 港珠澳大橋 > 離境篇 (往澳門) 先睇吓地圖講解下香港口岸既停車場先。港珠澳大橋香港口岸人工島共有5個停車場， 而可供預約（日泊／時租）既私家車停車場只得P2及P3兩個，P4係輕型客貨車預約停車場。P5係的士預約停車場。而最近旅檢大樓既P1停車場係不設預約既時租停車場。好明顯。P1係用黎比你上落客用。所以P1係有30分鐘免費泊車時間的。如果想預約既話，去呢個網址>> https://hzmbparking.com.hk/zh-hk (日泊收費$208/24小時) 泊好車，呢度有條扶手電梯，港珠澳大橋口岸同香港機場個設計基本上一樣，上層係出境，下層係入境。 一入到大樓，有幾間商店，就好似下圖咁，其餘乜都無，可以直接過關。 過咗香港海關之後，先去大堂中間既售票處買金巴車票。單程$65一位。（夜間單程收費為$70） 由於呢度仲係喺香港境內，所以你可以用八達通或信用咭比錢。 買飛後，出去室外排隊上金巴就可以。記住睇清楚你係去澳門定珠海，有兩個獨立月台候車的。 金巴車程大約35-45分鐘。有別於其他陸路口岸，你過左香港海關之後其實仲係喺香港境內範圍，不過，一上巴士嗰刻已經係用左軚駕駛方法行車，所以將來南車北上既朋友要小心！首先，你會沿住條路兜番去民航署總部後面既公路，然後會穿過觀景山隧道 (即係昂平360轉向站山邊嗰條隧道），再之後會沿住機場邊出海直達海珠澳大橋。 一落車，眼前就係澳門海關，順帶一提。澳門海關同珠海海關其實係兩座相連既大樓，就好似香港機場T1同T2航廈咁，行幾步就到，詳請睇回程篇詳細再講。 離開海關之後，就去到呢個巴士總站，前往市區既巴士線喺左手邊，而右手邊係賭場巴士。而其實最最最左手邊，仲有個月台，係比香港直接去澳門既港澳一號等直通巴士上車的。另外，由呢度乘搭去氹仔的賭場巴士係需要喺氹仔機場轉車的。所以無論你去氹仔任何一間酒店都可以搭同一班車，去咗氹仔機場先，再轉車時揀清楚你要去既酒店專車。 講番收費巴士方面。呢度一共有兩條前往澳門市區既巴士線，分別係去澳門市既101X（即係大三巴、新馬路及葡京一帶）同埋去氹仔既102X（即係官也街）。當中101X係24小時運作的，而102X則由上午６時至零晨１２時。小編親身試過搭102X去氹仔，需時約30分鐘。兩條巴士線既車費都係$6。 港珠澳大橋 >> 回程篇 (返香港) 由於小編係由氹仔回程，所以乘搭102X返黎港珠澳大橋澳門口岸。呢度同香港一樣，上層係離境，下層係入境。一落車，眼前呢座就係澳門海關大樓喇。 入到去左手邊行到盡，就會見到售票處，由於呢度係澳門範圍。所以今次唔可以用香港八達通比錢，反而可以用澳門通。可以接受港幣比錢，不過我諗大家用信用咭會方便啲。 買飛之後，沿地下既指示圖行，就可以去到上圖呢個分叉路。上文講到，澳門同珠海海關其實係兩座相連既大廈，所以你可以由呢度行番去珠海海關入境大陸，即係同時澳門離境兼大陸入境一次過做晒。調番轉，你可以喺珠海海關出境行過黎澳門海關入境都得。 我當大家返香港咁計，轉右就會去到澳門海關櫃位，出境返香港喇。 出咗隧道一陣，就黎到大橋既香港範圍。所以地下終於寫繁體字。另外，香港範圍有一樣香港常見既道路設備，就係雀籠（測速相機），你預咗有龍門架就有一部相機，好密架！！特別小心強風既日子，車速限制會由100改為50，一個唔小心，就扣分兼停牌！ 落車後，沿往香港既牌進入旅檢大樓，過完香港海關就可以行番出去巴士站、的士站同埋停車場。 港珠澳大橋出入境攻略： 去港珠澳要留意時間，上午係由珠海去香港既高峰期。所以呢個時間出發去澳門或珠海就最少人； 下午至黃昏就係去珠海既高峰期，所以唔好呢個時間離境； 如果你真係有需要去珠海，但係又太多人等金巴的話，其實你可以先搭去澳門，再用我上面既方法，入境澳門後，上一層去番出境大堂，行番去珠海海關嗰邊做出境澳門同入境珠海手續。(大前提係，你有權入境澳門，香港出世既朋友一定無問題啦，其餘既朋友要自己留意） （按我導航至P2停車場）