註: 本文係教你泊香港口岸轉金巴既流程。如果你想知道點樣申請直接揸車去澳門的話，請參閱 "乘電車跨過大海｜揸車去澳門好容易｜申請方法、最平保險介紹｜一文全攻略" 。 港珠澳大橋 > 離境篇 (往澳門) 先睇吓地圖講解下香港口岸既停車場先。港珠澳大橋香港口岸人工島共有5個停車場， 而可供預約（日泊／時租）既私家車停車場只得P2及P3兩個，P4係輕型客貨車預約停車場。P5係的士預約停車場。而最近旅檢大樓既P1停車場係不設預約既時租停車場。好明顯。P1係用黎比你上落客用。所以P1係有30分鐘免費泊車時間的。如果想預約既話，去呢個網址>> https://hzmbparking.com.hk/zh-hk (日泊收費$208/24小時) 泊好車，呢度有條扶手電梯，港珠澳大橋口岸同香港機場個設計基本上一樣，上層係出境，下層係入境。 一入到大樓，有幾間商店，就好似下圖咁，其餘乜都無，可以直接過關。 過咗香港海關之後，先去大堂中間既售票處買金巴車票。單程$65一位。（夜間單程收費為$70） 由於呢度仲係喺香港境內，所以你可以用八達通或信用咭比錢。 買飛後，出去室外排隊上金巴就可以。記住睇清楚你係去澳門定珠海，有兩個獨立月台候車的。 金巴車程大約35-45分鐘。有別於其他陸路口岸，你過左香港海關之後其實仲係喺香港境內範圍，不過，一上巴士嗰刻已經係用左軚駕駛方法行車，所以將來南車北上既朋友要小心！首先，你會沿住條路兜番去民航署總部後面既公路，然後會穿過觀景山隧道 (即係昂平360轉向站山邊嗰條隧道），再之後會沿住機場邊出海直達海珠澳大橋。 一落車，眼前就係澳門海關，順帶一提。澳門海關同珠海海關其實係兩座相連既大樓，就好似香港機場T1同T2航廈咁，行幾步就到，詳請睇回程篇詳細再講。 離開海關之後，就去到呢個巴士總站，前往市區既巴士線喺左手邊，而右手邊係賭場巴士。而其實最最最左手邊，仲有個月台，係比香港直接去澳門既港澳一號等直通巴士上車的。另外，由呢度乘搭去氹仔的賭場巴士係需要喺氹仔機場轉車的。所以無論你去氹仔任何一間酒店都可以搭同一班車，去咗氹仔機場先，再轉車時揀清楚你要去既酒店專車。 講番收費巴士方面。呢度一共有兩條前往澳門市區既巴士線，分別係去澳門市既101X（即係大三巴、新馬路及葡京一帶）同埋去氹仔既102X（即係官也街）。當中101X係24小時運作的，而102X則由上午６時至零晨１２時。小編親身試過搭102X去氹仔，需時約30分鐘。兩條巴士線既車費都係$6。 港珠澳大橋 >> 回程篇 (返香港) 由於小編係由氹仔回程，所以乘搭102X返黎港珠澳大橋澳門口岸。呢度同香港一樣，上層係離境，下層係入境。一落車，眼前呢座就係澳門海關大樓喇。 入到去左手邊行到盡，就會見到售票處，由於呢度係澳門範圍。所以今次唔可以用香港八達通比錢，反而可以用澳門通。可以接受港幣比錢，不過我諗大家用信用咭會方便啲。 買飛之後，沿地下既指示圖行，就可以去到上圖呢個分叉路。上文講到，澳門同珠海海關其實係兩座相連既大廈，所以你可以由呢度行番去珠海海關入境大陸，即係同時澳門離境兼大陸入境一次過做晒。調番轉，你可以喺珠海海關出境行過黎澳門海關入境都得。 我當大家返香港咁計，轉右就會去到澳門海關櫃位，出境返香港喇。 出咗隧道一陣，就黎到大橋既香港範圍。所以地下終於寫繁體字。另外，香港範圍有一樣香港常見既道路設備，就係雀籠（測速相機），你預咗有龍門架就有一部相機，好密架！！特別小心強風既日子，車速限制會由100改為50，一個唔小心，就扣分兼停牌！ 落車後，沿往香港既牌進入旅檢大樓，過完香港海關就可以行番出去巴士站、的士站同埋停車場。 港珠澳大橋出入境攻略： 去港珠澳要留意時間，上午係由珠海去香港既高峰期。所以呢個時間出發去澳門或珠海就最少人； 下午至黃昏就係去珠海既高峰期，所以唔好呢個時間離境； 如果你真係有需要去珠海，但係又太多人等金巴的話，其實你可以先搭去澳門，再用我上面既方法，入境澳門後，上一層去番出境大堂，行番去珠海海關嗰邊做出境澳門同入境珠海手續。(大前提係，你有權入境澳門，香港出世既朋友一定無問題啦，其餘既朋友要自己留意） （按我導航至P2停車場）

屯門公園比你嘅印象係咪娜娜？無架喇，自2018年12月起，屯門公園兒童遊樂場是香港首個將「水」同「沙」兩項自然元素納入設計嘅無障礙兒童遊樂場。遊樂場裏面提供多元化嘅共融遊樂設施，等不同年齡及能力嘅傷健兒童喺和睦愉快嘅環境中一同玩樂。真係好好玩架！ 除咗動之外，貴位新界西首個大型公園，呢度仲有個人工湖，湖邊一角闢為自然保育園地。湖上面仲可以畀你放搖控船，係除咗維多利亞公園之外另一個可以放搖控船嘅公園。 而必須要去嘅，就係1999年啟用嘅爬蟲館。爬蟲館的設施包括室內展覽缸及露天展覽場，展出不同品種的爬蟲類動物。該館現有30種共51隻活展品，當中包括地氈蟒、傘蜥、南美蚺、鼻鱉、輻射紋龜、齒緣攝龜、窩瑪蟒、蛛網龜、松果蜥、黑池龜、盾臂龜、綠鬣蜥、球蟒、藍舌石龍子等……。此外，館內以圖文介紹有關資料，並擺設七個爬蟲類的模型標本。爬蟲館每年的入場人次達36萬(包括28 800團體参觀者)，現已成為公園的主要景點。 開放時間 : 爬蟲館 每日上午九時至下午六時 (包括公眾假期)模型船池 每日上午七時至下午十一時(包括公眾假期)兒童遊樂場 每日上午七時至下午十一時(包括公眾假期)每星期一上午七時至下午一時暫停開放，以便進行場地保養工作。(如星期一為公眾假期，保養工作將順延至下一個工作天進行)其他公園設施 二十四小時 入場 : 免費 屯門公園共融遊樂場泊車泊邊好？ 愛定商場(友愛)停車場（按我導航）講到最近公園一定係愛定商場嘅友愛停車場喇，泊完車之後，沿愛明樓旁邊就可以直達公園南門。兩三分鐘就行到。價錢詳情請參閱泊好先。 V City停車場或屯門車站停車場（按我導航）南門就友愛近，咁北門就一定係V City喇。穿過條天橋就可以直達屯門公園，玩完又可以行吓商場攞埋免費泊車優惠先走。仲要V City個閒日時租價錢仲平過愛定商場，咁就更加唔駛諗泊V City或者屯門車站停車場啦。註：V City及屯門車站停車場入口均為同一層同一主入口，然後轉左係車站停車場；直去係V City停車場。兩者時租價錢一樣並同樣可以換領V City之免費泊車優惠。價錢詳情請參閱泊好先。 其餘屯門市廣場停車場，屯門時代廣場停車場等由於假日經常爆滿，故此泊邊好並不推薦。一般黎講友愛停車場車位會比較多，亦可以避開市中心嘅車龍。 #香港各大公園 #屯門 #親子自駕遊

我知道你心入面一定會話，去海之戀 Donki 泊入去海之戀咪得囉。但係你又有冇試過排隊排到去迴旋處甚至上番天橋?再加上海之戀個泊車優惠等於無優惠（見泊邊好OP Mall專頁）。所以總係好多人問泊邊好?今集就等泊邊好介紹既個又平又近既場比大家啦！由於價錢唔係相差太遠，我地由最近海之戀講起。 1. 海之戀商場 OP Mall（按我導航）除咗有時會排長龍之外，都無乜理由唔直入海之戀商場泊車架喇。時租唔係貴人好多$22 / $25（請參閱泊好先），不過佢個泊車優惠等於無優惠。佢一日未比錢落廣告我都係咁講架喇。所以好多人專登唔幫襯佢。 2. 荃灣西站停車場（按我導航）荃灣西站既入口同海之戀商場係一樣，只係荃灣西站停車場喺地庫，而海之戀商場係轉右上二樓。荃灣西站泊車之後，一樣有電梯直達商場各層。所以同泊海之戀商場係一樣咁方便。時租方面，正常價錢係$19 / $24（請參閱泊好先)，但係如果你識利用泊車轉乘優惠既話，就可以變成$12 / $15。 (識玩原站出入既自己玩，唔識既唔好玩爛)玩法好簡單，當你泊車之後，去荃灣西站入閘，於一分鐘後出閘，就會扣你最低消費$3.8。（記得要等一分鐘先出到閘架，扮搭車要扮全套)。之後你就可以安心去Donki行街，到你攞車後直接拍八達通出閘，就可以享有$12 / $15一小時優惠喇。咩話？你想連$3.8都慳？好啦，行兩步平多兩蚊好無？咁你泊車後唔好去荃灣西站入閘住，先去荃新天地UG/F，近UG56鋪對出既港鐵優惠站，拍一拍八達通減$2，之後安心去行街食飯，攞車前先至去荃灣西站玩入閘出閘。就可以減多$2，淨係比$1.8港鐵賺。 3. 大河道停車場（按我導航）其實喺如心廣場2期同海之戀商場中間既小巴站旁。時租係$16 / $19（請參閱泊好先)。近期減咗價迎戰荃灣西站泊車轉乘優惠，不過如果泊呢邊我寧願泊如心廣場２期好過，仲可以搏買野攞泊車優惠。 4. 如心廣場２期（按我導航）自從開咗如心廣場２期就好喇，唔駛再去荃灣廣場排長龍。而如心廣場２期既免費泊車優惠又易攞（請參閱泊邊好如心廣場專頁）。時租$18 / $25（請參閱泊好先)。 其餘荃灣廣場同荃新天地１，２期我就唔介紹住喇，呢啲老牌商場大家泊慣泊熟。同埋正常黎計以上呢幾個場都總會有位比你泊。夠用架喇。 #荃灣...

又一個維港既主題區開放喇，今次到位於銅鑼灣既《活力避風塘主題區》。位置黎講大家都好熟架喇，就係喺wtc more世貿中心對出既維多利亞港，即係原本怡和午炮既地方。所以交通都算方便，玩完仲可以去銅鑼灣行陣街先走。 《活力避風塘主題區》面積約10,900平方米，長約715米，係繼灣仔《水上運動及康樂主題區》之後，另一個採用無欄杆既梯級式沿岸設計。呢度提供一條長約90米既海岸堤階，令公眾同海面距離拉近。大家就可以無隔地欣賞避風塘同維港日落景緻。 灣仔就有水上單車踩，咁呢度又有咩娛樂設施呢？就係有嘩啦嘩啦 Walla-Walla歷史文化遊喇。主題區將會重現三艘昔日既經典船《嘩啦嘩啦》，比市民穿梭避風塘，體驗箇中既獨有文化。你仲可以登上全港唯一既水上三角天后平安堂內參觀，亦可以參水上市集同放祈願水燈。係咪好好玩呢？整個船程45分鐘，收費同預約就去呢個網睇啦。網址：CORAL SEA FERRY (coralseaferryservice.com.hk) 揸車既朋友可以參考以下地圖泊車，最近既當然會係wtc more停車場，又可以用The Point積分換泊車。如果你係信和會員或者有信和電動車優惠既朋友，泊旁邊既信和中心都係好選擇。 至於你想保證一定有位既，就要揀柏寧酒店停車場喇，提提你，呢個場用Wil積分換泊車就最抵，同一時間可以換多過一個鐘架。 註：相片來自香港政府網站 #區區泊邊好 #銅鑼灣 #各區公園泊邊好